Hizkuntza txikiek Korrika

Pello Uharte

Rith 2010 izeneko lasterketa, eginen dute Irlandan martxoaren 9tik 17ra bitartean. Gaelikoaren aldeko ekimen hau lehenengo aldiz eginen da aurten, urtero martxoan ospatzen den Gaelikoaren Astearen barruan.  Hemendik aurrera, berriz,  bi urtean behin antolatzeko asmoa azaldu dute. AEK-k eta KORRIKAren antolatzaileek parte hartuko dute.

Hogeita hamabi urte pasatxo,

hamasei KORRIKA eta

zenbat gehiago beharko diren 

egiten dut gogoeta,

bide luzea eginda ere

helmuga urrun da-eta.

Gure hizkuntzak irabazteko

geroaren lasterketa,

zuk behar nauzu, nik behar zaitut

denok behar dugu AEK.

Irlandak ere bere hizkuntza

badu beti-betikoa.

Hemen bezala, hau zoritxarra!

ez da mintzatzen nahikoa.

Hizkuntz txikien gaixotasuna

da hil ala bizikoa,

baina Belfasten, aste honetan,

KORRIKA lehenbizikoa

AEK lagun, abiatuko da

salbatzeko gaelikoa.